Út er komið nýtt hefti af Tímariti Máls og menningar, annað hefti ársins. Meðal efnis í heftinu er grein eftir Soffíu Bjarnadóttur um kynleiðréttingarferli sonar síns og smásaga eftir Davíð Stefánsson þar sem rifjuð eru upp raunveruleg atvik á Biskopsarnö í Svíþjóð þar sem Karl Öve Knausgaard kom við sögu, og hann hefur sjálfur rakið í Baráttusögu sinni. Oddný Eir Ævarsdóttir deilir með okkur margvíslegum þýðingartilraunum sínum og Kristín Ómarsdóttir talar að þessu sinni við Sigurlín Bjarneyju Gísladóttur um líf hennar og skáldskap.

Í heftinu eru greinar eftir Arnar Má Arngrímsson um hættur snjalltækja, Þórarin Eldjárn um Sigurð Guðmundsson og Musu hans, Auðólf Gunnarsson um Magnús „frater“ Eríksson, Kjartan Má Ómarsson um Guðjón Samúelsson, Ásdísi R. Magnúsdóttur um Camus og Árna Bergmann um Tolstoj eða Majakovskíj.

Ljóð eru eftir Sigurlín Bjarneyju, Hallgrím Helgason, Fríðu Ísberg, Irene Hrafnan, Þorvald S. Helgason og Sigurð Ingólfsson. Auk þess er Hugvekja Einars Más Jónssonar á sínum stað og umsagnir um bækur.