„Um leið og bók Susan Abulhawa er grípandi skáldverk, að hluta til sjálfsævisögulegt, um líf þriggja kynslóða, ástir og missi, þá er hún fyrsta heildstæða sögulega verkið sem kemur út á íslensku um örlög palestínsku þjóðarinnar, um hernámið og landflóttann. Ég mæli eindregið með þessari bók,“ segir Sveinn Rúnar Hauksson formaður Félagsins Ísland-Palestína um bókina Morgnar í Jenín sem nýverið kom út í íslenskri þýðingu Ásdísar Guðnadóttur.

Bókin hefur vakið verðskuldaða athygli hér heima og víðar. Í þessu áhrifamikla verki veitir höfundurinn Susan Abulhawa lesendum innsýn í líf flóttafólks í Palestínu, gleði þeirra og raunir, og rekur sögu þriggja kynslóða. Í viðtali í Fréttablaðinu um helgina útskýrði hún m.a. áhrifamátt bókmenntanna og mikilvægi þeirra í andófinu gegn ríkjandi hugmyndum. „Palestínumönnum er svo ranglega lýst í vestrænum fjölmiðlum að fólk er hætt að líta á þá sem manneskjur. Ímynd fólks af Palestínumönnum er að þeir séu brjálaðir og ofstækisfullir. Bókmenntir búa yfir þeim töfrum að geta dregið hið mannlega fram í fólki. Með þeim er hægt að sýna fegurð fólks og menningar þess. Það er vegna þessa að bókmenntir eru öflugt mótstöðuafl. Það er erfiðara fyrir fólk að láta sér standa á sama um þig ef það skilur að þú ert manneskja.“