Nýlega kom út ný ljóðabók, Rómantískt andrúmsloft, eftir Braga Ólafsson. Baldur A. Kristinsson gefur bókinni fjórar stjörnur í dómi sínum í Morgunblaðinu sl. sunnudag.

Baldur segir eitt megineinkenni ljóða Braga vera hvernig þau tjá hið samsetta, margræða og stundum mótsagnakennda eðli vitundarinnar. Baldur kemst að þeirri niðurstöðu að Bragi sé ögn alvarlegri og djúphugulli en áður í verkum sínum en segir þó að lágstemmda kímnin og hið óvenjulega sjónarhorn Braga sé til staðar.

Besta ljóð bókarinnar að mati Baldurs er Að hugsa sér sem hér fylgir með, lesendum til yndisauka.

Að hugsa sér

Í nokkur ár

hef ég haft í höfðinu

mynd af þorpi sem ekki er til

annars staðar.

Og yfir þorpinu

fljúga nokkrir mávar,

og hljóðin sem þeir senda frá sér

segja allt um svona þorp

sem maður þarf að vita.

Að hugsa sér:

það þarf ekki meira

en hljóð úr nokkrum fuglum

til að allt fari af stað

og allt stöðvist:

að myrkrið sem grúfir yfir

verði að engu.